مقالات مختارة

سيدي ابو حسين..إسمعنا..؟؟

 

نور نيوز ـ كتبت: ايمان عكور

 

كلمات من القلب

مني ومن الملايين من شعبك اللي بحبك

خليك بينهم

اسمع منهم مش من اللي حواليك

ترا شعبك بسيط وقلبه ابسط

كل اللي ناقصه

انه تروح الحواجز اللي بنوها بينك وبينهم

انه صوتهم يوصلك بدون ما يتفلتر

انه حبهم يوصلك بدون ما يتشكك فيه..!!.

 

اللي حولك صورولك انهم همه بس المخلصين واللي خايفين عالبلد

لكنهم يا سيدي مخطئين وكذابين

اشتغلت بمعيتك ١٥ سنة..

وبعرف نفسيات قريبة منك مريضة انتهازية وضعيفة ومهزوزة

لكنها تبدع في الكذب والتملق..

همها مصلحتها مش همها الوطن..

هاي الناس . .ما بمثلوا ابدا الوطن

هاي الناس ما همها غير حالها.

هاي الناس عند الجد..صدقني ما راح تلاقيهم..

وأول ناس طيارتهم بتكون جاهزة

لانه الوطن بالنسبة الهم

حساب بنك عنده تخمة..؟

 

اللي خلف دائرتهم همه شعبك الحقيقي المخلص..مش همه

تجاوزهم سيدي والتقي دايما بشعبك وجها لوجهة

راح تعرف قديش عانوا ويعانوا

حتى يظل وطننا مستقر آمن بقيادتك.

افتح الابواب الكاتمة لصوت المواطن المقهور اللي بنوها حولك..

واطلع واسمع لعيلتك اللي بتحبك

واللي حتى لو قست عليها الحياة والظروف والحكومة..

بتضل دايما تهتف باسمك..!!

والسبب..انها بتحبك..

 

الناس ما عادت تتحمل قهر

شعبك واع وبطل يخاف من انه يحكي كلمة الحق

من انه يواجه الفاسد

ويقول لأكبر مسؤول..

انت كذاب بنص عينك

امشي بينهم بدون حاشية

واسمع وجعهم خلف ابواب بيوتهم

ببكوا بصمت لانه عندهم كرامة وعزة نفس…!!

 

ما بدنا بلدنا تضيع واحنا بنتفرج

ما بدنا المندسين اللي بنتظروا لحظة الصفر

انه ينقضوا على الوطن

ويروح الوطن بشربة مي..!!

كل اللي بدنا اياه..

انه تطلع على شعبك

وتحكي معهم اللي ببالك بكل صراحة

وبكل تلقائية

وبدون ما تستشير حدا من اللي حواليك

صدقني وقتها بس

حتى الجوعان راح يقسم اللقمة مع جاره

علشان الوطن يضل بخير…!!

 

كلنا وقفنا مع الوطن لما احتاجنا بهيك ظروف..

مع انه الغالبية ما معها ثمن رغيف الخبز

شعبك يا سيدي تعب

من الجوع..من القروض..من البطالة

من الجباية..ومن استجداء اللقمة

شعبك يا سيدي..عم بموت وهو عايش

والفتات اللي بترميه عليه الحكومات

صار زي السم طعمه..

كل اللي عمله..

انه الموت صار ابطئ واشد وجع..

صدقني مش كورونا هو السبب

احنا عنا مليون كورونا عايش بينا

من سنين..بيمص بدمنا

وبسرق أحلامنا.. وبتفلسف علينا

وبالنهاية..حبل المشنقة بلفه على رقبتنا..؟

واجا كورونا الجديد علشان لصوص الوطن

يسرقوا اللي ضل بجيوب الشعب المخزوقة

وكله باسم حمايتهم..

 

يا سيدي..وحدك انت عندك الحل

كلمة منك..بتحيي الأمل بقلوبهم

بس لازم تكون الكلمة منك..بدون اللي حولك..

لانهم كذابين..فاسدين..سراقين

وأروع ممثلين…

 

بترجاك سيدي.. لا تتاخر عليهم

بلاش نبكي ونقول

يا ريت اللي جرى ما صار..!!

 

وللمرة المليون بنقلك

راح نبقى شعبك اللي بحبك وحدك

واللي بيفدي تراب الوطن

حمى الله الأردن ..

 

ملاحظة

هالرسالة

كتبت معظمها من سنتين..

لكن بما انه الوضع زاد سوءا

قلت خلينا نجرب

لانه وحده ابو حسين

اللي قادر يخفف الأنين..؟.

 

#ايمان_عكور

مقالات ذات صلة

زر الذهاب إلى الأعلى