مقالات مختارة

لا تركب الموجة

نور نيوز –

بقلم
راسم المرواني

خلوني اسولفلكم على جماعة (لا تركب الموجة) ليش خايفين من مقتدى الصدر، وما يردون الصدريين يشتركون بالتظاهرات ..
خلي اسولفلكم (قربة الى الله)

اذا اشتركوا الصدريين بالتظاهرات فـــ :-

أولاً / بعد ماكو قناص :
لأن الصدريين اذا لگفوا أو اشتموا ريحة قناص، فبدقيقتين يشيلونه شيل (هوه والبناية الخاتل بيها)، ويوزعون لحمه (ثواب) لابو عبد الله، ويبتلي هوه والجهة اللي دازته .

ثانياً / بعد ماكو رمي :
صحيح الصدريين يحبون القوات الامنية، وراح يهدولهم (ورد) اثناء التظاهرات، بس اذا واحد (مندس) ضمن القوات الامنية يرمي عالمتظاهرين، فالصدريين راح يصمطون ابو أبوه (عاجلاً أم آجلاً) .

ثالثاً / بعد ماكو مندسين :
لأن الصدريين اذا لگفو واحد مندس ويرفع شعارات مغرضة او يريد يسوي فتنة، فراح يچفصون ببطنه، ويحمسوه حمس، (وما يلحگ يگول انطوني ماي) ويسلموه للقوات الأمنية (نص ستاو)، هاي اذا سلموه .

رابعاً / بعد ماكو كلاوات :
يعني ما تشتغل عدهم الوعود والكلاوات الحكومية و (بوس عمك بوس عمك)، لأن چانو يردون هاي التظاهرات من الله، ومشترينها شراية، وهيچ تستمر الثورة، حتى يقضي الله أمراً كان مفعولا .

خامساً / بعد ماكو انحراف :
يعني الصدريين راح يعلسون (بطريقتهم الخاصة) أي واحد يريد يحرف مكاسب الثورة لاغراض طائفية أو حزبية أو فئوية، أو يستغلها لاغراض مالها علاقة باهداف الثورة .

سادساً / بعد ماكو عمالات :
يعني كلاوات التوجيهات مال التنسيقيات واللجان والاجندات الخارجية وسوالف الفضائيات المؤدلجة وسوالف الـ (شو) ما تشتغل عدهم، لأن يمكن عدهم عقدة نفسية وحساسية جلدية من كلشي خارجي .

سابعاً / بعد ماكو حواسم :
لأن كل تظاهرات الصدريين ما صارت بيهه ولا حالة وحدة للسرقات أو حرق منشآت، وبالعكس، همه راح يحمون الدوائر والبنوك، والحرامية راح يمسحون ايديهم بالحايط، (ويعذرونا اخوتنا المتانين بابواب المصارف والبنوگ).

ثامناً / بعد ماكو مجاملات :
لأن الصدريين (ما عدهم صاحب صديق)، وفعلاً عدهم (الطايح رايح)، وعدهم قابلية يسحلون حتى جماعتهم، فالسالفة ما تتحمل مجاملات وقوط وأربطة، وهذا من ربعنا وذاك من ربعكم، ولذلك ما يفلت منهم جماعة التصريحات والشعارات .

تاسعاً / وهاي الخاتمة
٩٩٪؜ من الصدريين متدربين وعدهم خبرة متراكمة بالميدان وبالتظاهرات، وجابوها ركضة بركضة من جيش المهدي للخاصة لسرايا السلام، وطاگات كلهن يم روسهم، ويعرفون شلون يتعاملون ويه الاحداث .

هسه وضحت خالي ؟؟
خوش

اللهم وحّد قلوب العراقيين، ولا تشمت بهم حاسداً ولا حاقدا

مقالات ذات صلة

زر الذهاب إلى الأعلى